Беларуская дыяспара ў Кракаве ўжо чацвёрты год запар арганізоўвае Каляды — галоўнае зімовае свята з ялінкай і падарункамі для дзетак ды мерапрыемствамі для ўсіх. Дапамажыце нам арганізаваць Каляды-2024 і разам адзначыць канец года.

Кожны год мы рыхтуем падарункі для сотні дзетак, і кожны год мы маглі узрадаваць усіх беларусікаў дзякуючы вам! Менавіта ваша падтрымка дазваляе нам ствараць гэта свята для ўсіх.

Каляды адбудуцца 15 снежня (нядзеля) у Muzeum Podgórza (ul. Limanowskiego 51). Першыя мерапрыемствы пачнуцца а 11:00, а ўсё свята працягнецца да 19:30. 

Вас чакае інтэрактыўны спектакль ад Святога Мікалая і яго каманды, якая рыхтуе святочныя падарункі для дзетак. Акрамя таго, мы будзем калядаваць з этна-гуртам Laleja, гуляць у калядны квіз ды піць гарбату ад «Чайнай пошты Кракаў».

👉 Каб ваша сям’я атрымала гасцінец ад Святога Мікалая, калі ласка, запоўніце гэту анкету. 

Поўную праграму Калядаў мы апублікуем у акаўнтах «Крока» у Instagram і Facebook, а таксама ў Telegram-канале Беларускай дыяспары Кракава. Падпісвайцеся, каб нічога не прапусціць.

Мы ніколі не забываем пра тых, хто адзначае святы за кратамі, і таму ў нас традыцыйна будзе магчымасць падпісаць паштоўку для палітзняволеных і даслаць яе ў Беларусь.

Арганізатары і арганізатаркі не бяруць сабе ганарараў. Усе сабраныя грошы ідуць выключна на падрыхтоўку мерапрыемстваў.

💛 Хто арганізоўвае Каляды

За падрыхтоўку Калядаў адказвае таварыства «Крок» (Białoruskie Stowarzyszenie “Krok”) — івент-каманда беларускай дыяспары ў Кракаве, якая займаецца арганізацыяй вялікіх мерапрыемстваў (Ноч расстраляных паэтаў, Тыдзень роднай мовы і іншыя), а таксама нашага летняга Пікніка Letucień. Каб даведацца больш пра нашы актыўнасці, зазірніце ў Instagram. Калі вы хочаце далучыцца да нас ці прапанаваць партнёрства, пішыце на пошту [email protected].

Кожным сумесным святам мы спрабуем дадаць і дзецям, і дарослым добрых успамінаў, натхніць і падтрымаць сваіх, а таксама захаваць нашую цудоўную культуру ў сэрцах, бо, як казаў Караткевіч, кожны носіць сваё неба з сабой. І Беларусь там, дзе мы з вамі.