Пяты год беларуская дыяспара ў Кракаве ладзіць зімовае свята з ялінкай і падарункамі для дзетак ды забавамі для ўсіх. Каляды — сапраўдны дзень яднання беларусаў і беларусак перад Новым годам, і мы просім дапамагчы зрабіць іх яркімі і поўнымі цеплыні!

Каляды адбудуцца 14 снежня (нядзеля) у Muzeum Podgórza (ul. Limanowskiego 51). Першыя мерапрыемствы пачнуцца а 11:30, а ўсё свята працягнецца да 19:30.

З вашай падтрымкай мы штогод рыхтуем падарункі для сотні дзетак, а ўручае іх Святы Мікалай разам з камандай падчас святочнага спектаклю ад аматарскага тэатру "Nievymoŭnaje". Акрамя таго, мы будзем калядаваць з этна-гуртам Laleja, піць гарбатку ад «Чайнай пошты Кракаў», есці дранікі і шмат чаго яшчэ!

Поўную праграму Калядаў мы апублікуем у акаўнтах «Крока» у Instagram і Facebook, а таксама ў Telegram-канале Беларускай дыяспары Кракава. Падпісвайцеся, каб нічога не прапусціць! Там жа ў хуткім часе з’явіцца форма для рэгістрацыі вашых дзетак на спектакль і падарункі.

Арганізатары і арганізатаркі не бяруць сабе ганарараў. Усе сабраныя грошы ідуць выключна на падрыхтоўку мерапрыемстваў.

💛 Хто арганізоўвае Каляды

За падрыхтоўку Калядаў адказвае таварыства «Крок» (Białoruskie Stowarzyszenie “Krok”) — івент-каманда беларускай дыяспары ў Кракаве, якая займаецца арганізацыяй вялікіх мерапрыемстваў, а таксама летняга Пікніка Letucień. Калі вы хочаце далучыцца да нас ці прапанаваць партнёрства, пішыце на пошту [email protected].

Кожным сумесным святам мы спрабуем дадаць і дзецям, і дарослым добрых успамінаў, натхніць і падтрымаць сваіх, а таксама захаваць нашую цудоўную культуру ў сэрцах, бо, як казаў Караткевіч, кожны носіць сваё неба з сабой. І Беларусь там, дзе мы з вамі.