На сувязі «Кніжны Вырай» – бібліятэка, якая вырашыла стаць выдавецтвам! Калі мы з вамі яшчэ не знаёмыя, давайце гэта выправім. Мы – невялікая ініцыятыўная група, якая аднойчы сабралася разам з адной простай, але вельмі важнай мэтай: зрабіць кнігі на роднай мове дасяжнымі для беларусаў і беларусак Кракава.

Мы пачыналі са стварэння ўтульнай бібліятэкі для нашай супольнасці, ладзілі розныя імпрэзы, і сёння нашыя паліцы налічваюць ужо больш за 800 кніг!

Але ў працэсе мы зразумелі адну рэч: проста збіраць кнігі нам ужо мала. Нам захацелася іх ствараць. Мы набылі першыя аўтарскія правы на пераклад і выдалі па-беларуску цудоўны комікс «Трымайся, трусік!». І ведаеце што? Спыніцца аказалася проста немагчыма! Мы сціпла паабяцалі сабе: «Добра, будзем набываць правы і рабіць хаця б па адной кніжцы на год». І ўзяліся за пераклад легендарнай «Анатоміі» Адама Кея ...

📚 Што гэта за кніга

«Kay’s Anatomy» — сусветны бэстсэлер пра чалавечае цела, створаны пісьменнікам і былым медыкам Адамам Кеем і ілюстратарам-гумарыстам Генры Пакерам. Колькасць прададзеных асобнікаў «Анатоміі» разам з перакладамі на шматлікія мовы па ўсім свеце перавысіла мільён. Эх, вось бы беларускім кнігам такія продажы!

Мы ў «Кніжным выраі» вырашылі, што такая кніга не павінна заставацца без беларускага перакладу, таму рыхтуем да друку нашу версію! Ну, як нашу, яе падрыхтавала прафесійная каманда — перакладчыца, рэдактарка, карэктарка. Цяпер мы рыхтуем праект кнігі да друку і запрашаем вас падтрымаць наш праект!

Гэта не падручнік! Гэта кніга поўная гумару пра:

• мозг, сэрца, скуру, косці;
• бактэрыі, вірусы, брыдкасці і асаблівасці нашага цела;
• тое, пра што дзеці (а часам і дарослыя) па-сапраўднаму хочуць ведаць у стасунку да свайго цела, але не заўжды могуць запытацца.

Для каго кніга

• Для цікаўных дзяцей: якім хочацца ведаць, як працуе цела (і якія задаюць шмат нязручных пытанняў)
• Для дарослых: якія так і не атрымалі адказы на гэтыя пытанні ў сваім дзяцінстве.
• Для ўсіх, хто хоча прасунуцца ў анатамічнай лексіцы па-беларуску

💛 Пра беларускае выданне

• Прафесійны пераклад складанай анатамічнай тэрміналогіі са слоўнікам напрыканцы
• Мяккая каляровая вокладка, дзякуючы чаму кніжка важыць менш і яе лёгка перавозіць у валізцы і чытаць пад коўдрай з ліхтарыкам
• У сярэдзіне багата арыгінальных ілюстрацый Генры Пакера. Ілюстрацыі чорна-белыя
• Дробныя адаптацыі для беларускага чытача, але з захаваннем фірмовага гумару Кея
• Каля 400 старонак карыснай і захапляльнай інфармацыі

💸 На што грошы?

Нам трэба сабраць сродкі на:

• Ліцэнзію і роялці. Правы мы атрымалі амаль задарма, але мы мусім плаціць аўтару невялікі адсотак з кожнай прададзенай кнігі.
• Пераклад 
• Рэдактуру/карэктуру 
• Вёрстку 
• Друк (наклад 300 шт.) 
• Лагістыка і іншае (бухгалтэрыя, банкаўскія камісіі, упакоўка, абавязковыя экзэмпляры) 

🤝 Як стаць часткай праекта?

Усё вельмі проста: падтрымайце нас праз гэтую зборку. Фактычна, ваш унёсак – гэта паўнавартасная перадзамова кнігі.

Што гэта дае вам? Гарантыю таго, што вы атрымаеце свежанькі асобнік «Анатоміі» ў ліку самых першых чытачоў, адразу як ён выйдзе з друкарні!

Што гэта дае нам? Жыццёва неабходную фінансавую падушку. Сабраныя сродкі пойдуць выключна на аплату самога друку і на тое, каб разлічыцца з камандай, якая ўжо выканала сваю вялікую працу над тэкстам.

📦 Важна: пра дастаўку

Калі вы знаходзіцеся ў Кракаве, мы з вялікай радасцю перададзім вам кнігу асабіста! Але калі вам патрэбна дастаўка ў іншы горад ці краіну, калі ласка, звярніце ўвагу: паштовыя выдаткі трэба будзе аплаціць дадаткова (яны не ўваходзяць у суму ўнёску за кнігу).

Чаму так? Наш папярэдні досвед з глабальнай рассылкай коміксаў «Трымайся, трусік!» быў цудоўным, але кошт паштовых паслуг ледзь не пусціў нас саміх па свеце без вопраткі =) Таму гэтым разам мы вельмі спадзяёмся на вашае разуменне і падтрымку!

🤝 Хочаце дапамагчы бясплатна? Гэта таксама магчыма! Перашліце інфармацыю знаёмым, раскажыце пра нас за гарбатай або напішыце пару цёплых слоў у нашых сацсетках. Чым больш людзей даведаецца пра «Анатомію Кея» па-беларуску, тым хутчэй яна пабачыць свет! ❤️

🕒 Калі чакаць кнігу

Вось наш графік:

• ☑️ пераклад – ужо гатовы
• ☑️ карэктура/рэдактура - зробленыя
• ☑️ вёрстка – зроблена
• ☑️ друк у тыпаграфіі – 4-6 тыдняў,
• ☑️ дастаўка папярэдніх замоў – чэрвень-ліпень

Як і з коміксам "Трымайся, Трусік!" мы маем намер расказваць нашым спонсарам, як ідзе праца, ці ёсць затрымкі і максімальна хутка дасылаць паасобнічкі, калі яны прыедуць з друкарні.

🤍

Чаму гэты праект важны для нас (і для вас)?

«Кніжны вырай» – гэта невялікая ініцыятыва. Мы (пакуль) не зарабляем на продажы кніг, за намі няма вялікіх спонсараў. Мы звычайныя эмігранткі, працуем не ў ІТ-сферы, і выцягнуць усе выдаткі на выданне кнігі самастойна для нас вельмі цяжка.

Але ў нас ёсць вялікая мара і справа, якая жыве ў самым сэрцайку: рабіць выдатныя сусветныя выданні даступнымі на беларускай мове. І мы ганарымся тым, што часам робім немагчымае: напрыклад, мы, зусім маленькія, змаглі набыць правы ў самога брытанскага гіганта Penguin Publishers! Мы ў шоку.

Каб гэтая кніга стала рэальнасцю, нам патрэбны мінімальны збор, які пакрые выдаткі на ліцэнзію, пераклад і друк. Кожная замоўленая вамі кніга — гэта ваша персанальная інвестыцыя ў дзіцячую навукпоп-літаратуру і падтрымка беларускай культуры ў не самыя простыя часы.