Шаноўныя сябры, Вольны Хор вырашыў сам прыехаць у Кракаў, цалкам за свой кошт. Удзельнікі Хору едуць з розных гарадоў, хто машынай, хто цягніком. У іх няма фінансавых мажлівасцяў застацца ў Кракаве на ноч, а за выступы ўдзельнікі Хору не атрымаюць ганарараў.

Калі вы хочаце выказаць удзельнікам Хору падзяку, дапамагчы ім пакрыць кошты на падарожжа да нас і назад, калі ласка, перашліце сюды ахвяраванне перад 22-ім студзеня, каб у дзень выступу можна было перадаць сабранае ад дыяспары дырыжорцы Хору па іх першым канцэрце на Віле Дэц'юса.

*

«Вольны хор» — гэта музычны грамадска-палітычны рух, які аб'яднаў людзей розных прафесій, не толькі музыкаў і вакалістаў, але і інжынераў, эканамістаў, настаўнікаў, мастакоў і шматлікіх іншых. Ён узнік як рэакцыя на фальсіфікацыю прэзідэнцкіх выбараў 2020 года. Ужо больш за два гады «Вольны хор» змагаецца за права беларусаў свабодна і адкрыта выказваць свае думкі.

Чальцы «Вольнага Хору» былі вымушаны з’ехаць з Беларусі праз палітычны пераслед.

Рэпертуар «Вольнага Хору» складаюць беларускія творы. «Вольны хор» ставіць за мэту папулярызацыю беларускай музыкі і яе распаўсюд. Важным для ўдзельнікаў «Вольнага Хору» з’яўляецца адраджэнне забытых твораў, пошук загубленных спеваў і іх вяртанне ў сучасную музычную прастору. Сёння, як ніколі, варта вучыць дзяцей і дарослых беларускім спевам, ўзгадоўваць культуру массавага спеву, адраджаць шматвекавую традыцыю беларускай харавой культуры.